އުފާލި މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ ކުރީގެ ނައިބު ރައީސްގެ މަގާމުގައި ހުންނަވައިގެން ކޮމިޝަންގެ މުވައްޒަފަކަށް ޖިންސީ ފުރައްސާރަ ކުރި ކަމަށް ތުހުމަތު ކުރެވޭ މައްސަލައިގައި މުހައްމަދު ފަޒީންގެ މައްޗަށް ދައުވާކޮށްފި އެވެ.
ޕީޖީ އޮފީހުން ބުނީ ފަޒީންގެ މައްޗަށް އުފުލީ ޖިންސީ ގޯނާކުރުމުގެ ދައުވާ އާއި ގައިގައި އަތްލުމުގެ ދައުވާ ކަމަށެވެ.
ފަޒީން ވަނީ އޭނާގެ މައްޗަށް ކުރާ ތުހުމަތުތައް މީގެކުރިން ދޮގުކުރައްވާފަ އެވެ. އެ ތުހުމަތުތަކަށް ބާރުދޭ ހެއްކެއް ވެސް ނެތް ކަމަށް ފަޒީންގެ ގާނޫނީ ޓީމުން ކުރިން ވަނީ ވިދާޅުވެފައެވެ.
”މި މައްސަލަ ކޮމިޝަނުގެ ކޮމިޓީއަކުންނާއި ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީ އާއި ފުލުހުން ތަހުގީގު ކުރުމުން ވެސް ބުނި ބުނުން ފިޔަވައި ގުޅުވައިލެވޭނެ އިތުރު އެއްވެސް ހެއްކަކާއި ގަރީނާއެއް ވެސް ދެއްކިފައި ނުވުމަކީ މިއީ ބުހުތާނު ދޮގެކޭ ދަންނަވަން ޖެހޭ އެއް ސަބަބު،“ ފަޒީންގެ ވަކީލުން ކުރިން ނެރުނު ބަޔާނުގައިވެ އެވެ.