ސްކޫލު ބޮޑު ޗުއްޓީގައި އުމްރާގެ އަޅުކަން އަދާކުރަން ދިޔަ މީހުންގެ ތެރެއިން އެނދުމަތިކޮށްފައިވާ ބަލި މީހަކު ގެނައުމަށް މަސައްކަތްކުރަމުން އަންނަ ކަމަށް، އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ޑރ. ޝަހީމް މިރޭ ވިދާޅުވީ މި ބަންދުގައި 7،500އަށް ވުރެ ގިނަ މީހުން އުމްރާގެ އަޅުކަން ފުރިހަމަކުރުމަށް މައްކާއަށް ގޮސްފައިވާ ކަމަށާއި އޭގެތެރެއިން ހާލު ދެރަވި މީހަކު މާލެ ގެނައުމުގެ މަސައްކަތް ކުރަމުން އަންނަ ކަމަށެވެ.
އެޑްމިޓްކުރެވިފައިވާ އެ ބަލި މީހާ ރާއްޖެ ގެނައުމުގެ މަސައްކަތް އާއިލާއާ ގުޅިގެން މި މަހުގެ 10 ގައި މާލެ ގެނެވޭނެ ކަމަށް ޝަހީމް ވިދާޅުވިއެވެ.
އެކަމުގައި ގައުމީ އެއާލައިން މޯލްޑިވިއަނާއި އައިޖީއެމްއެޗުގެ އެއްބާރުލުން ލިބެމުން އަންނަކަމަށް ޝަހީމް ވިދާޅުވިއެވެ.
އުމްރާގެ އަޅުކަން އަދާކުރަން ދިޔަ ދިވެހީންގެ ހާލު ޖުމުލަކޮށް ރަނގަޅު ކަމަށް ވެސް ޝަހީމް ވިދާޅުވިއެވެ.