ސިވިލް ސާވިސް މުވައްޒަފުން ހެދުން އަޅަން ޖެހޭ ގޮތް ބަޔާންކޮށް ސިވިލް ސާވިސް ގަވާއިދަށް ގެނައި އިސްލާހަށް އަދާލަތު ޕާޓީން ތާއީދުކޮށްފިއެވެ.
އިދިކޮޅު އެމްޑީޕީން އެ އިސްލާހާ ދެކޮޅު ހަދާފައި ވަނިކޮށް އަދާލަތު ޕާޓީން މިއަދު ނެރުނު ބަޔާނެއްގައި ވަނީ ސިވިލް ސާވިސްގެ ގަވާއިދަށް ގެނެސްފައިވާ އިސްލާހުތަކަކީ ހެޔޮ ބަދަލުތަކެއް ކަމަށެވެ. އަދި އެއީ މުޖުތަމަޢުގެ ދީނީ އަދި އިޖުތިމާޢީ ސަލާމަތްތެރިކަމަށްޓަކައި އެޅި ރަނގަޅު ފިޔަވަޅުތަކެއްގެ ގޮތުގައި ދެކޭ ކަމަށް އެ ޕާޓީން ބުންޏެވެ.
”އެންމެ ފުރިހަމަ ގޮތަށް ޢަމަލު ނުކުރެވުނު ނަމަވެސް ރަނގަޅު ގޮތާ ގާތްކުރާ ހެޔޮ ބަދަލުތަކަކީ އެކަމަށް ތަރުހީބުދީ ހިތްވަރުދޭންޖެހޭ ކަންކަމެވެ.“ އެ ބަޔާނުގައިވެއެވެ.
އެ ޕާޓީން ބުނީ، އިސްލާމް ދީނަކީ އިންސާނާގެ ދިރިއުޅުމުގެ ހުރިހާ ކަމެއް އެންމެ ފުރިހަމަ ގޮތުގައި ތަރުތީބުކޮށްދޭ ދީން ކަމަށެވެ. އެގޮތުން، ހެދުން އެޅުމުގެ މިންގަނޑުތަކަކީ އިސްލާމީ ތަރުބިއްޔަތާއި، އަޚުލާގުގެ ވަރަށް މުހިންމު ބައެއް ކަމަށާއި އިސްލާމްދީނުގައި ހެދުން އެޅުމުގެ މަގުސަދަކީ ހަމައެކަނި ފިނިހޫނުމިނުން ސަލާމަތްވުމާއި ޒީނަތްތެރިވުމެއް ނޫންކަން އަދާލަތު ޕާޓީގެ ބަޔާނުގައިވެއެވެ.
ހެދުން އެޅުމުގެ އެންމެ ބޮޑު މަގުސަދަކީ އައުރަ ނިވާކުރުމާއި، އިންސާނާގެ އިއްފަތްތެރިކަމާއި ކަރާމާތް ރައްކާތެރިކުރުންކަން ކަމަށް އެ ޕާޓީން ބުންޏެވެ. އަދި އިސްލާމްދީނުގައި އައުރަ ނިވާކުރުމަކީ ކޮންމެ މުސްލިމް ފިރިހެނަކާއި އަންހެނެއްގެ މައްޗަށްވާ ވާޖިބު ކަމެއްކަމަށް ވެސް އެ ޕާޓީން ހަނދާން ކޮށްދިނެެވެ.
އަދާލަތު ޕާޓީގެ ބަޔާނުގައި ފާހަގަކޮށްފައިވާގޮތުގައި، އިސްލާމީ މިންގަނޑުތަކާ އެއްގޮތަށް ހެދުން އެޅުމުގައި ބަލަން ޖެހޭ މުހިންމު އަސާސްތަކުގެ ތެރޭގައި، އެ ހެދުމަކީ ހަށިގަނޑުގެ ބައްޓަން އެނގޭ ފަދަ ބާރު ހެދުމަކަށް ނުވުމާއި، އެތެރެ ފެންނަ ފަދަ ތުނި ހެދުމަކަށް ނުވުން ހިމެނޭކަމަށެވެ.
”އައުރަ ނިވާކުރުމަކީ ﷲ ތަޢާލާގެ އަމުރުފުޅެކެވެ. އެ އަމުރުފުޅާ ދެކޮޅު ހެދުމަކީ އެކަލާނގެ ބާވައިލެއްވި ޙުކުމްފުޅަކާ ދެކޮޅު ހެދުމެވެ. އެހެންކަމުން އެއީ އެއްވެސް މުއުމިނު ފިރިހެނަކަށް ވެސް ނުވަތަ އަންހެނަކަށް ވެސް އިޚްތިޔާރު ލިބިގެންވާ ކަމެއް ނޫނެވެ.“ އެ ޕާޓީން ބުންޏެވެ.