ޗެލްސީގެ ކޯޗުގެ މަގާމުން އެންޒޯ މަރެސްކާ ވަކިވެއްޖެއެވެ.
ޗެލްސީން ނެރުނު ބަޔާނުގައި ބުނީ، ހަތަރު މުބާރާތުގައިވެސް މުހިންމު ލަނޑުދަނޑިތަކެއް ހުރިއިރު، ޗެލްސީ ހަމަހަގަށް އެޅުވުމަށް ކޯޗު ބަދަލުކުރުމަކީ އެންމެ ރަނގަޅު ނިންމުން ކަމަށް މަރެސްކާ އާއި ކްލަބުން އެއްބަސްވާ ކަމަށެވެ.
ޗެލްސީން ލީގުގައި އެންމެ ފަހުން ކުޅުނު ހަތް މެޗުގެ ތެރެއިން މޮޅުވެވިފައިވަނީ އެންމެ މެޗަކުންނެވެ. ޑިސެންބަރު މަހު ހަ މެޗުން ހަ ޕޮއިންޓު ލިބުނުއިރު، އެ ޓީމު އޮތީ އެއްވަނައިގައި އޮތް އާސެނަލް އަށްވުރެ 15 ޕޮއިންޓު ފަހަތުގަ އެވެ.
އުމުރުން 45 އަހަރުގެ ކޯޗު، ޗެލްސީ ދޫކޮށްލީ އެ ޓީމަށް ކްލަބް ވޯލްޑް ކަޕް ކާމިޔާބުކޮށްދިންތާ ހަ މަސް ދުވަސްވެސް ނުވަނީހެވެ.
މަރެސްކާ ޗެލްސީން ވަކިވިއިރު، އެ ޓީމަށް އެދެވޭ ނަތީޖާ ނުނެރެވުމުގެ އިތުރުން، ތަފާތު އެކި މައްސަލަތައް ޖެހިފައިވެއެވެ. އެގޮތުން، މީޑިއާގައި ކްލަބްގެ ނިންމުންތަކާ ދެބަސްވާކަން ފާޅުކޮށް ބުނުމާއި، ކްލަބްގެ ޓްރެކްސޫޓް ނުލުން ފަދަ ކަންކަން ހިމެނެއެވެ.
އަންގާރަ ދުވަހު ބޯންމައުތު ކައިރިން 2-2 ގެ ނަތީޖާއަކުން އެއްވަރުވި މެޗަށްފަހު މަރެސްކާ މީޑިއާ އާ ވާހަކަ ނުދެއްކިއިރު، ޗެލްސީން އާއްމުކުރި އައު އަހަރުގެ ވީޑިއޯގައިވެސް މަރެސްކާ ހިމަނާފައެއް ނުވެ އެވެ.