ރުގްޔާގެ ނަމުގައި އަންހެނަކާއި ކުޑަކުދިންތަކަކަށް ޖިންސީ ގޯނާކުރި ދެ މީހަކު ޖަލަށް ލާން ކްރިމިނަލް ކޯޓުން ހުކުމްކޮށްފިއެވެ.
އެ މައްސަލާގައި ހުކުމްކޮށްފައި ވަނީ ރ. ކަނދޮޅުދޫ، މިރިހިމާގެ އިސްމާއިލް ވަހީދާއި ރ. ކަނދޮޅުދޫ، ދިލްސާދުއާގެ މުހައްމަދު އަސީލްގެ މައްޗަށެވެ.
އެ ދެ މީހުންގެ މައްޗަށް ދައުވާ އުފުލީ 30 ޑިސެމްބަރު 2020 ވަނަ ދުވަހުއެވެ.
އެ ދައުވާ އުފުލީ 2020 ވަނަ އަހަރު އެކި ދުވަސް މަތިން، އަންހެނަކާއި އުމުރުން 18 އަހަރު ނުފުރޭ ތިން ކުދިންނަށް ރުގްޔާ ކުރުމުގެ ނަމުގައި ޖިސްމާނީ ހާނިއްކަކޮށް، ޖިންސީ ގޯނާކޮށްފައިވާތީއެވެ.
އެ މައްސަލާގައި އެ ދެ މީހުންގެ މައްޗަށް ކުރި ޖުމްލަ 12 ދައުވާ އިއްޔެ ވަނީ ސާބިތުވެފައެވެ.
ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ގަސްދުގައި އަތްލުމުގެ ދައުވާ އާއި ޖިންސީ ގޯނާކުރުމުގެ ދާއުވާ ހިމެނޭހެން އަސީލްގެ މައްޗަށް ކުރި ހަތް ދައުވާ ވެސް ސާބިތުވާ ކަމަށް ކަނޑައަޅައި 25 އަހަރާއި 10 މަހާއި 24 ދުވަހަށް ޖަލަށްލުމަށް ހުކުމްކުރިއެވެ.
އެ މައްސަލައިގައި ދެން ހިމެނޭ، އިސްމާއިލް ވަހީދަށް ކުރި ފަސް ދައުވާ ސާބިތުވެ، އޭނާ ހަ އަހަރާއި ނުވަ މަހާއި 18 ދުވަހަށް ޖަލަށްލާން ވަނީ ހުކުމްކޮށްފައެވެ.