ލޮލުގެ ފެނުމުން މަހްރޫމްވެފައިވާ އައްޝައިޚް މުހައްމަދު އިބްރާހީމަށް އިސްލާމިކް މިނިސްޓްރީން ވަޒީފާ ހަމަޖައްސައިދީފިއެވެ.
އައްޝައިޚް މުހައްމަދު އިބްރާހީމަކީ ދީނުގެ ކަންކަން ރައްޔިތުންނަށް ބަޔާންކޮށްދިނުމުގައި ވަރަށް މޮޅު ހުނަރެއް ލިބިވަޑައިގެންފައިވާ ކުޅަދާނަ ދީނީ އިލްމުވެރިޔެކެވެ.
އޭނާ މިހާތަނަށް ވަޒީފާ އަދާކުރައްވަމުން ގެންދެވީ ޅ. ނައިފަރު، މަދަރުސަތުލް އިފްތިތާހުގެ އިސްލާމް ޓީޗަރެއްގެ ގޮތުގައެވެ. ސިއްހީ ހާލަތު ހުރިގޮތުން ނޯޕޭ ލީވްގައި ޝެއިޚް މުހައްމަދު އިބްރާހީމް ހުންނަވާތާ ހަތަރު އަހަރު ވެއްޖެއެވެ. އެކަމުގެ ސަބަބުން މާލީގޮތުން ވެސް ޝައިޚަށް ވަނީ ދަތިތަކާ ކުރިމަތިލާންޖެހިފައެވެ.
މިކަމާ ގުޅިގެން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ އައްޝައިޚް މުހައްމަދު އިބްރާހީމާ ބައްދަލުކުރައްވައި އޭނާއަށް އެ މިނިސްޓްރީގެ ވަޒީފާ ހަމަޖެއްސެވި ކަމުގެ އުފާވެރި ޚަބަރު ދެއްވާފައެވެ.
މިނިސްޓަރު ޝަހީމް ވިދާޅުވީ ސިއްހީ ހާލަތު ދަށްވިޔަސް މިނިސްޓްރީން ބޭނުންވަނީ ޝައިޚްގެ ޚިދުމަތް ގައުމަށް ދެވޭނެ ފަދަ ފުރުސަތުތަކެއް ފަހިކޮށްދިނުމަށް ކަމަށެވެ. އެގޮތުން ކުރިއަށްއޮތްތަނުގައި އިސްލާމިކް މިނިސްޓްރީން ކުރިއަށްގެންދާ ދީނީ ނަސޭހަތް ދިނުމުގެ ޕްރޮގްރާމްތަކުގައި އައްޝައިޚް މުހައްމަދު އިބްރާހީމް ރައްޔިތުނަށް ދީނީ ދަރުސްތައް ދެއްވާނެ ކަމަށް ޝަހީމް ވިދާޅުވިއެވެ.
ޝެއިޚް މުހައްމަދު އިބްރާހީމް ހަމަޖެއްސީ އެ މިނިސްޓްރީގެ ’ދައުވާ އެންޑް ގައިޑެންސް ސެކްޝަން’ގެ ވާއިޒު މުޝްރިކްގެ މަގާމަށެވެ.
މިއީ ޕަބްލިކް ސާވިސް ރޭންކު ހަތެއްގެ ވަޒީފާއެކެވެ. އެ މަގާމުގެ އަސާސީ މުސާރަ އަކީ 14،225 ރުފިޔާއެވެ. މަގާމުގެ އެލަވަންސްގެ ގޮތުގައި 6،640 ރުފިޔާ ލިބެއެވެ. އަދި ހާޒިރީ އިނާޔަތުގެ ގޮތުގައި ހާޒިރުވާ ކޮންމެ ދުވަހަކަށް 180 ރުފިޔާ ލިބޭނެއެވެ.