ޔޫއޭއީގެ ރައީސް ޝައިޚް މުހައްމަދު ބިން ޒައިދު އަލް ނަހްޔާން، ޕާކިސްތާނަށް ކުރެއްވި އަމިއްލަ ދަތުރުފުޅެއްގައި އެ ގައުމުގެ ބޮޑުވަޒީރު ޝެހްބާޒް ޝަރީފްއާ ބައްދަލުކުރައްވައިފިއެވެ.
ޝެއިޚް ނަހުޔާން އާއި ޕާކިސްތާނުގެ ބޮޑުވަޒީރުގެ ބައްދަލުވުމުގައި ވަނީ ދެ ގައުމުގެ ކުރިއެރުމާއި، ދުނިޔޭގައި ސުލްހައާއި ހަމަޖެހުން ޤާއިމުކުރުމާ ގުޅޭގޮތުން މަޝްވަރާތައް ކުރައްވައިފައެވެ.
މި ބައްދަލުވުމުގައި ޔޫއޭއީ އާއި ޕާކިސްތާނާ ދެމެދު އޮތް ބަދަހި ގުޅުމަށް ދެ ބޭފުޅުން ވެސް އަލިއަޅުވާލައްވައި، އިގްތިސާދާއި ވިޔަފާރި، އަދި ތަރައްގީގެ ދާއިރާތަކުން އިތުރަށް އެއްބާރުލުން ދިނުމާ ގުޅޭގޮތުން ވެސް މަޝްވަރާ ކުރެއްވިއެވެ. އަދި ދެ ގައުމުން ވެސް ކަންބޮޑުވާ ސަރަހައްދީ، ބައިނަލްއަޤްވާމީ ގިނަ މައްސަލަތަކެއްގައި ޚިޔާލު ބަދަލުކުރެއްވިއެވެ.
ޝެހްބާޒް ޝަރީފް ވަނީ އެކި ދާއިރާތަކުން ދެގައުމުގެ ގުޅުން ބަދަހިކުރުމަށް ޔޫއޭއީގެ ރައީސް ވައުދުވެވަޑައިގެންފައިވާތީ އެކަމަށް ޝުކުރު އަދާކުރައްވާފައެވެ.
ޕާކިސްތާނުގެ ފޮރިން މިނިސްޓްރީން ނެރުނު ބަޔާނެއްގައި ބުނީ ޔޫއޭއީގެ ރައީސްގެ މިދަތުރުފުޅަކީ ދެގައުމުގެ މެދުގައި ޒަމާނުއްސުރެ އޮތް އެއްބަނޑު އެއްބަފާ ގުޅުން އިތުރަށް ބަދަހިކުރުމަށް ލިބުނު ފުރުސަތެއް ކަމަށެވެ.