ގްލޯބް ސޮކަރ އެވޯޑްސް އިން ހޮވި އަހަރުގެ އެންމެ މޮޅު ފުޓުބޯޅަ ކުޅުންތެރިޔަކަށް ވެސް، ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ އޮސްމާން ޑެމްބެލޭ ހޮވިއްޖެއެވެ.
އާދީއްތަ ދުވަހުގެ ރޭ އޮތް އެވޯޑު ހަފްލާގައި އަހަރުގެ މޮޅު ކުޅުންތެރިޔަކަށް ޑެމްބެލޭ ހޮވިފައިވާއިރު، އޭގެ ކުރިން އޭނާ ވަނީ ދުނިޔޭގެ މޮޅު ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު އަދި ފީފާ ބެސްޓް އެވޯޑު ވެސް ހާސިލު ކޮށްފައެވެ. އެއާ އެކު ޑެމްބެލޭ ވެގެން ގޮސްފައި ވަނީ، ބެލެންޑިއޯ އާއި، ފީފާ ބެސްޓް އެވޯޑު އަދި ގްލޯބް ސޮކަރ އެވޯޑު އެއް އަހަރުގެ ތެރޭގައި ހޯދި ފުރަތަމަ ކުޅުންތެރިޔާ އަށެވެ.
މިދިޔަ ސީޒަންގައި ޑެމްބެލޭ ވަނީ ޕީއެސްޖީ އާއެކު ގިނަ ކާމިޔާބީ ތަކެއް ހޯދައި، މޮޅު ކުޅުމެއް ވެސް ދައްކައިފަ އެވެ. އެގޮތުން ޕީއެސްޖީ އިން އެ ކުލަބުގެ ތާރީޚުގައި ފުރަތަމަ ފަހަރަށް ޔުއެފާ ޗެމްޕިއަންސް ލީގު ކާމިޔާބު ކުރިއިރު، ޑެމްބެލޭ ވަނީ އިސް ދައުރެއް އަދާ ކޮށްފައެވެ.
އަދި ޑެމްބެލޭ ވަނީ ޕީއެސްޖީ އާއެކު ފްރާންސް ލީގުގެ އިތުރުން، ފްރާންސް ކަޕް އަދި ޓްރޮފީ ޑީ ޗެމްޕިއަންސް ވެސް ކާމިޔާބު ކޮށްފަ އެވެ. ޗެމްޕިއަންސް ލީގުގެ މިދިޔަ ސީޒަންގެ އެންމެ މޮޅު ކުޅުންތެރިޔަކަށް ވެސް ހޮވުނީ ޑެމްބެލޭ އެވެ. އަދި ފްރާންސް ލީގުގެ އެންމެ މޮޅު ކުޅުންތެރިޔަކަށް ވެސް ޑެމްބެލޭ ހޮވުނުއިރު، އެންމެ ގިނަ ލަނޑު ޖެހި ކުޅުންތެރިންގެ ތެރޭގައި ވެސް އޭނާ ހިމެނެއެވެ.
މީގެ އިތުރުން މިއަހަރުގެ އެންމެ މޮޅު އަންހެން ކުޅުންތެރިޔަކަށް ހޮވުނީ ބާސެލޯނާ އަށް ކުޅެމުން އަންނަ އައިޓާނާ ބޮންމާޓީ އެވެ. އޭނާ ވަނީ ފީފާ ބެސްޓް އެވޯޑު ވެސް ކާމިޔާބު ކޮށްފަ އެވެ. ގްލޯބް ސޮކަރ އިން ހޮވި އަހަރުގެ އެންމެ މޮޅު ކޯޗަކީ ޕީއެސްޖީ އަށް އިރުޝާދު ދެމުން އަންނަ ސްޕެއިންގެ ލުއިސް އެންރީކޭ އެވެ. އޭނާގެ އިރުޝާދުގެ ދަށުން ޕީއެސްޖީ އިން ވަނީ ކަލަންޑަރު އެއް އަހަރުގެ ތެރޭގައި ހަ ތަށި ކާމިޔާބު ކޮށްފައެވެ.
އެންމެ މޮޅު މިޑްފީލްޑަރަކަށް ހޮވުނީ ޕީއެސްޖީ އަށް ކުޅެމުން އަންނަ ވިޓީނިއާ އެވެ. އެންމެ މޮޅު ފޯވަރޑަކަށް ހޮވުނީ ބާސެލޯނާ އަށް ކުޅެމުން އަންނަ ލަމީން ޔަމާލް އެވެ. މިޑްލް އީސްޓުގެ އެންމެ މޮޅު ކުޅުންތެރިޔަކަށް ހޮވުނީ އަލް ނަޞްރަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯއެވެ.
މީގެ އިތުރުން އެންމެ މޮޅު ރައީސަކަށް ޕީއެސްޖީގެ ރައީސް ނާޞިރު އަލް ޚެލާފީ ހޮވުނުއިރު، އެންމެ މޮޅު ކުލަބަކީ ވެސް ޕީއެސްޖީއެވެ.