ހުޅުމާލޭގައި އިމާރާތް ކުރަމުންދާ ކޭ-ޕާކު ރެޒިޑެންސްގެ ފްލެޓުތަކުގެ މައްސަލައިގައި ޙަސަން މަމްދޫހުގެ މައްޗަށް 94 ދަޢުވާ، އަދި ޖައިޝާން ސަޢީދުގެ މައްޗަށް 89 ދަޢުވާ ސާބިތުވާ ކަމަށް ކްރިމިނަލް ކޯޓުން މިއަދު ކަނޑައަޅައިފިއެވެ.
މި މައްސަލައަކީ މަމްދޫޙާއި އިތުރު ބަޔަކު ބައިވެރިވެގެން ހަންބޯ ކޮމްޕެނީ ޕްރައިވެޓް ލިމިޓެޑުގެ މެޖޯރިޓީ ހިއްސާދާރު ޗައިނާގެ ޖިން ޝިހޫގެ ސޮއި ފޯޖު ކޮށްގެން ލިޔެކިޔުންތަކެއް ހަދައި، ބޭންކް އޮފް މޯލްޑިވްސްގައި އެކައުންޓެއް ހުޅުވައިގެން ހިންގާފައިވާ ބޮޑު އޮޅުވާލުމެކެވެ. މިގޮތުން ކޭ-ޕާކް ރެސިޑެންސްގެ އެޕާޓްމަންޓްތައް މަކަރާއި ޙީލަތުން ޢާންމުންނަށް ވިއްކައި، ބައެއް އެޕާޓްމަންޓްތައް އެކަކަށްވުރެ ގިނަ މީހުންނަށް ވިއްކައިގެން ފައިސާއަށް ޚިޔާނާތްތެރިވެފައިވާ ކަމަށް ދައުލަތުން ބުނެފައިވެއެވެ.
ޕްރޮސެކިއުޓަރ ޖެނެރަލްގެ އޮފީހުން ހާމަކުރި ގޮތުގައި، މަމްދޫހުގެ މައްޗަށް ސާބިތުވި 94 ދަޢުވާގެ ތެރޭގައި ހިމެނެނީ ޓެކުމުގެ 46 ދަޢުވާ، އޮޅުވާލުމުގެ އަމަލެއް ކުރުމުގެ 44 ދަޢުވާ، ޞައްޙަނޫން ލިޔުމެއް ދިނުމުގެ 3 ދަޢުވާ އަދި މަނީ ލޯންޑްރިންގެ 1 ދަޢުވާއެވެ.
ޖައިޝާން ސަޢީދުގެ މައްޗަށް ސާބިތުވެފައިވަނީ ޓެކުމުގައި ބައިވެރިވުމުގެ 45 ދަޢުވާއާއި، އޮޅުވާލުމުގެ ޢަމަލެއް ކުރުމުގެ 40 ދަޢުވާއާއި، ޞައްޙަނޫން ލިޔުމެއް ދިނުމުގެ 3 ދަޢުވާގެ އިތުރުން މަނީ ލޯންޑަރ ކުރުމަށް އެހީތެރިވުމުގެ 1 ދަޢުވާއެވެ.
މި މައްސަލާގައި މަނީ ލޯންޑްރިންގގެ ދަޢުވާ ސާބިތުވެފައިވާތީ، އެފްޑަބްލިއު ރެޒިޑެންސްގައި ހުރި މަމްދޫހުގެ އަގުބޮޑު އެޕާޓްމަންޓާއި އެތަނުގެ ޕާކިންގ ސްލޮޓް ދައުލަތަށް ނެގުމަށް ވެސް ކޯޓުން ވަނީ ނިންމާފައެވެ. މި މައްސަލައިގައި ދެން އޮންނާނީ އަދަބު ކަނޑައެޅުމެވެ.
ކްރިމިނަލް ކޯޓުން ނިންމާފައިވަނީ މި ދަޢުވާތަކާ ގުޅިގެން އަދަބު ކަނޑައެޅުމުގެ އަޑުއެހުން 30 ޑިސެންބަރު 2025 ދުވަހު ބޭއްވުމަށެވެ.