ދިރާގު ދިވެހި ޕްރިމިއާ ލީގުގައި ރޭ ކުޅުނު މެޗުން ކްލަބް އީގަލްސް އިން ލީގަށް ވާދަކުރަމުން އަންނަ އޮޑި ސްޕޯޓްސް ކްލަބް 2-0 އިން ބަލިކޮށްފިއެވެ.
އީގަލްސް އިން ލީޑުނެގީ އޮޑީގެ ކުޅުންތެރިން ހެދި ގޯހެއްގެ ފައިދާނަގައިގެންނެވެ. އެ ގޮތުން، މެޗުގެ 31 ވަނަ މިނިޓްގައި އޮޑީގެ މުހައްމަދު ސާމިރު ފަހަތަށް ދިން ބޯޅައެއް ހޯދައި، އީގަލްސްގެ އިބްރާހިމް މަހުދީ (ފޭދޫ އިއްބެ) ތަނަވަސްކޮށްދިން ފުރުސަތެއްގައި ތިރިތިރިން ގޯލުގެ ކަނަށް ބޯޅަ ފޮނުވާލައިގެން ޒައިން ޒަފަރު ވަނީ އީގަލްސް އަށް ލީޑުނަގައިދީފައެވެ.
އޮޑި އަށް އެއްވަރުކޮށްދޭން އެ ކްލަބުން ފޮނުވާލި ހަމަލާތައް އީގަލްސްގެ ކީޕަރު، މުހައްމަދު އަޝްވާން ވަނީ މަތަކޮށްފައެވެ. އަދި، އޮޑީގެ ލިތުއޭނިއާ ފޯވާޑް، ކަރޮލިސް ލައުކްޒެމިސް ފޮނުވާލި ބޯޅައެއް ވަނީ ހުރަސްދަނޑިއަށް އަމާޒުވެފައެވެ.
ދެ ވަނަ ހާފުގައި އީގަލްސް އިން ލަނޑު ޖަހާނެ ފުރުސަތުތަކެއް ކައުންޓަ އެޓޭކުގައި ހޯދަމުންދިޔައިރު، އެ ޓީމުގެ ދެ ވަނަ ލަނޑު ޖެހީ މެޗުގައި ރަނގަޅު ކުޅުމެއް ދެއްކި، ސިއެރަ ލިއޯންގެ މިޑްފީލްޑަރު އިބްރާހިމް ލެބީ އެވެ. މެޗުގެ 66 ވަނަ މިނިޓްގައި ލެބީ މި ލަނޑު ޖެހީ އޭރިއާތެރެއިން ޒައިން ދިން ބޯޅައަކުންނެވެ. މި ލަނޑު ޖެހުމުގެ ކުރިން ލެބީ އަތުން ރަނގަޅު ދެ ފުރުސަތެއް ވަނީ ގެއްލިފަ އެވެ.
ލީގުގެ ދެ ވަނަ ބުރުގައި ކުޅުނު ފުރަތަމަ ދެ މެޗުން ބަލިވި އީގަލްސް އިން ދެ ވަނަ ބުރުގައި ހޯދި ފުރަތަމަ މޮޅާ އެކު، 12 މެޗުން 16 ޕޮއިންޓް ހަމަކޮށް، މި ވަގުތު އޮތީ ލީގުގެ ހަ ވަނައިގައެވެ.
މި ނަތީޖާއާ އެކު އެންމެ ބޮޑު ހިތްހަމަ ޖެހުމެއް ލިބޭނީ ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަން އަށެވެ. އެއީ، މާޒިޔާ އަށް އެއް ވަނައިގައި ހަ ޕޮއިންޓުގެ ލީޑެއް ލިބޭނެތީ އެވެ. މާޒިޔާ އަށް 12 މެޗުން 34 ޕޮއިންޓް ލިބިފައިވާއިރު، އޮޑި އަށް 12 މެޗުން ލިބިފައިވަނީ 28 ޕޮއިންޓެވެ. ލީގުގައި އޮޑި ބަލިވެފައިވަނީ، އީގަލްސް އާއި މާޒިޔާ އަތުންނެވެ.