މިއަހަރުގެ ކާވާ ކަޕް އަންހެނުންގެ ވޮލީމުބާރާތުގެ ފައިނަލް މެޗުގައި ދިވެހިރާއްޖެއާއި ކިރިގިސްތާނު ބައްދަލުކުރި މެޗު 3 ސެޓް 1 ސެޓުގެ ނަތީޖާއަކުން މެޗު ކާމިޔާބު ކުރީ ކިރިގިސްތާނު ޓީމެވެ.
ސޯޝަލް ސެންޓަރުގައި ރޭ ކުރިއަށްދިޔަ މި މެޗު ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދެވެ.
މި މެޗު ފެށުމުގެ ކުރިން ރައީސުލްޖުމްހޫރިއްޔާގެ އަނބިކަނބަލުން، ދިވެހި ޓީމުގެ ކުޅުންތެރިންނާއި ސަލާމްކުރައްވައި، ކުޅުންތެރިންނަށް ހިތްވަރުދެއްވިއެވެ.
ދިވެހިރާއްޖޭގެ ޤައުމީ އަންހެން ވޮލީބޯޅަ ޓީމު، ކާވާ ކަޕްގައި މޮޅު ކުޅުމެއް ދައްކައި، މުބާރާތުގެ ފައިނަލަށް ދަތުރުކުރުމަކީ ވަރަށް ބޮޑު ފަޚުރެއްކަން ފާހަގަކުރައްވައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުވެސް ވަނީ ޓީމުގެ ކުޅުންތެރިންނަށް ހިތްވަރު ދެއްވާފައެވެ. އެމަނިކުފާނުގެ ރަސްމީ އެކްސް އެކައުންޓުން މިއަދު ހިއްސާކުރެއްވި މި މެސެޖުގައި ފައިނަލްމެޗު ކާމިޔާބުކޮށް މުބާރާތުގެ ޗެމްޕިއަންކަން ދިވެހީންނަށް ލިބުމަށް އުންމީދުކުރައްވާކަން ހާމަކުރައްވާ، ދިވެހިން ތިބީ ޓީމުގެ ފަހަތުގައިކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރޭގެ ރަސްމިއްޔާތުގައި ރައީސުލްޖުމްހޫރިއްޔާގެ އަނބިކަނބަލުން ވަނީ ޗެމްޕިއަން ޓީމަށް ގޯލްޑް މެޑެއްޔާއި ޓްރޮފީ ހަވާލުކޮށްދެއްވާފައެވެ. މި ރަސްމިއްޔާތުގައި ރައީސުލްޖުމްހޫރިއްޔާގެ އަނބިކަނބަލުން ވަނީ ޗެމްޕިއަން ޓީމާއެކު ގްރޫޕް ފޮޓޯއެއް ނަންގަވާފައެވެ.