އަންނަ އަހަރުން ފެށިގެން ދަރިވަރުންނަށް ކްލާހުގައި ފޯނު ބޭނުން ނުކުރެވޭނެ

އަންނަ ދިރާސީ އަހަރުން ފެށިގެން ދަރިވަރުންނަށް ކްލާހުގައި ފޯނު ބޭނުންކުރުން މަނާކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ހުޅުމާލެ 1 ގައި ދިރިއުޅޭ ރައްޔިތުންނާ ބައްދަލުކުރައްވަން ރެހެންދި ސްކޫލްގައި ރޭ ކުރިއަށްދިޔަ ޖަލްސާގައި ރައީސް ވިދާޅުވީ ގްރޭޑް 10 އިން ފެށިގެން ދަށުގެ ދަރިވަރުންނަށް ފޯނު ގެންދިޔުން މަނާކުރެވިފައިވީ ނަމަވެސް އެކަން ތަންފީޒު ނުކުރެވޭ ކަމަށާއި އަންނަ ދިރާސީ އަހަރު ފެށުމާއެކު ގްރޭޑް 10 އިން ދަށުގެ ދަރިވަރުންނަށް ސްކޫލަށް ފޯނު ނުގެންދެވޭނެ ކަމަށެވެ.

އަދި ގްރޭޑް 11 އަދި 12 ގެ ދަރިވަރުންނަށް ސްކޫލަށް ފޯނު ގެންދެވުނު ނަމަވެސް ކިޔަވައިދޭ ވަގުތުގައި ފޯނު ބޭނުން ނުކުރެވޭނެ ކަމަށް ރައީސް ވިދާޅުވިއެވެ.

”ރަސްމީ ސްކޫލް ގަޑީގަ ފޯނެއް ގްރޭޑް 10 އިން ދަށުގެ ކުދިންނަށް ބޭނުން ނުކުރެވޭނެ. ގްރޭޑް 11، 12 ކުދިންނަށް ފޯނު ގެންދެވޭނެ، އެހެން ނަމަވެސް އެޑިއުކޭޝަން މިނިސްޓްރީން އެބަ ހޯއްދަވާ ލޮކާ ސިސްޓަމެއް. ސްކޫލުގައި ބަހައްޓަވާނެ ކްލާސްތަކުގައި ބަހައްޓަވާނެ އެ ލޮކާ ސިސްޓަމް. ބެހެއްޓީމަ ކްލާސް ގަޑީގަ އެއްވެސް ކުއްޖަކު ފޯނު ބޭނުން ނުކުރެވޭނެ. އެ ލޮކަރަށް ލާފައި ބަންދުކޮށްފައި، ކްލާސް ގަޑީގައި ފޯނު ބޭނުންނުކޮށް، ކްލާސް ނިމުނީމަ ފޯނު އަތަށް ލިބޭގޮތަށް ބަދަލުކުރާނަން،“ ރައީސް ވިދާޅުވި އެވެ.

ރައީސް މިކަން އިއުލާންކުރައްވާފައިމިވަނީ ދާދިފަހުން ރާއްޖޭގެ ސްކޫލެއްގައި ކްލާސް ގަޑީގައި ދަރިވަރުންތަކެއް ފޯނު ގެންގުޅުމާ ގުޅޭ މައްސަލަތަކެއް ފެންމަތިވެ، ދަރިވަރުން ސްކޫލަށް ފޯނު ގެންދިޔުން މަނާކުރަން ގިނަ ބަޔަކު ގޮވާލަމުންދާ ދަނޑިވަޅެއްގަ އެވެ.