ދިރާގު ދިވެހި ޕްރިމިއާ ލީގުގައި ރޭ ނިއުރޭޑިއަންޓް ސްޕޯޓްސް ކުލަބާއި ދެކޮޅަށް ކުޅުނު މެޗު ފަހަތުން އަރައި، 3-1 ގެ ނަތީޖާއަކުން ވިކްޓަރީ ސްޕޯޓްސް ކުލަބުން ކާމިޔާބުކޮށްފިއެވެ.
ގަލޮޅު ދަނޑުގައި ރޭ ކުޅުނު މެޗު ފަށައިގެން ހަތަރު ވަނަ މިނެޓްގައި ނިއު އިން ވަނީ ލަނޑެއް ކާމިޔާބުކޮށް މެޗު ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ބްރެޒިލްގެ މިޑްފީލްޑަރު، ގޯމޭސް ޑަ ސިލްވާ އެވެ. މިއީ އެޓީމުގެ ކެޕްޓަން އަލީ ފާސިރު (ސެންޓޭ) ތަނަވަސްކޮށްދިން ފުރުސަތެއްގައި އޭނަ ކާމިޔާބުކޮށްދިން ލަނޑެކެވެ.
ވިކްޓަރީ އިން ނަތީޖާ އެއްވަރުކުރި ލަނޑު ފުރަތަމަ ހާފުގެ 29 ވަނަ މިނެޓުގައި ކާމިޔާބުކޮށްދިނީ އެޓީމުގެ ސްލޮވާކިއާ ފޯވާޑް، މިލޯސް ލެޗްނީ އެވެ. މިއީ މި ފަހަރުގެ ޓްރާންސްފާގައި ނިއުއާ ގުޅެން މަޝްވަރާކޮށް، ފަހުން ވިކްޓަރީ އަށް ލޯނަކަށް ސޮއިކުރި އީގަލްސްގެ ކެޕްޓަން، އަހުމަދު ރިޒުވާން (ރިޒޭ)، ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.
މީގެ އިތުރުން ވެސް މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުން ކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-1 ގެ ނަތީޖާއަކުން ދެޓީމު އެއްވަރިވެފައި އޮވެގެންނެވެ.
މެޗުގެ ދެވަނަ ހާފުގައި ވިކްޓަރީ އިން އެޓީމުގެ އެޓޭކުތައް އިތުރަށް ވަރުގަދަކުރިއިރު، އެޓީމުން މެޗުގެ ލީޑުހޯދީ ދެވަނަ ހާފުގެ 57 ވަނަ މިނެޓުގައެވެ. މިލަނޑު ވެސް އެޓީމަށް ކާމިޔާބުކޮށްދިނީ ސްލޮވާކިއާ ފޯވާޑް ލެޗްނީ އެވެ. އަދި އެޓީމުން ލީޑު ފުޅާކުރި ލަނޑު މެޗުގެ 87 ވަނަ މިނެޓުގައި ކާމިޔާބުކޮށްދިނީ އުޒްބެކިސްތާންގެ ޑިފެންޑަރު، ޖަވޯހިރް އަޒަމޯވް އެވެ.
މިނަތީޖާއެކު ލީގުގައި ކުޅުނު 11 މެޗުން ވިކްޓަރީއަށް 16 ޕޮއިންޓް ލިބިފައިވާއިރު، މިމެޗުން ބަލިވި ނިއުރޭޑިއަންޓް ލީގުގައި ކުޅުނު 16 މެޗުން ހޯދި 20 ޕޮއިންޓާއެކު އެޓީމު މިވަގުތު އޮތީ ތާވަލުގެ ތިންވަނައިގައެވެ.