ދިވެހި ބޭސްވެރިކަން ކުރިއަރުވައި، އެ ދާއިރާ ހަރުދަނާ ކުރުމަށްޓަކައި ޤައުމީ ބޭސްވެރިކަމުގެ ކޮމިޓީއެއް އެކުލަވާލުމުގެ މަސައްކަތް މިހާރު ކުރަމުންދާ ކަމަށް ސިއްޙަތާއި ބެހޭ ވަޒީރު ޢަބްދުﷲ ނާޒިމް އިބްރާހިމް ވިދާޅުވެއްޖެއެވެ.
ވަޒީރު މިކަން ހާމަކުރެއްވީ، އިންޑިއާގެ ނިއުދިއްލީގައި ކުރިއަށްދިޔަ ޓްރެޑިޝަނަލް މެޑިސިންއާ ބެހޭ ޑަބްލިޔުއެޗްއޯގެ ދެވަނަ ގްލޯބަލް ސަމިޓުގެ ވަޒީރުންގެ ފެންވަރުގެ ބައްދަލުވުމެއްގައި ބައިވެރިވެ ވަޑައިގެން ވާހަކަފުޅު ދައްކަވަމުންނެވެ.
ވަޒީރު ނާޒިމް ވިދާޅުވީ، ރާއްޖޭގެ ސިއްޙީ ދާއިރާގައި އިސްކަންދޭ ކަންތައްތަކާ އެއްގޮތަށް، ރައްކާތެރިކަމާއެކު އަދި ހެކިތަކުގެ މައްޗަށް ބިނާކޮށް، ދިވެހި ބޭސްވެރިކަން ކުރިއެރުވުމަށް ސަރުކާރުން މަސައްކަތް ކުރަމުންދާ ކަމަށެވެ. އެގޮތުން، ދިވެހި ބޭސްވެރިކަމަކީ ހަމައެކަނި އާންމުކޮށް ބޭނުން ކުރާ ބޭސްވެރިކަމެއްގެ ގޮތުގައި ބެލުމުގެ ބަދަލުގައި، ސައިންސާއި އަޚްލާޤީ އަދި ހަމަހަމަކަމުގެ މައްޗަށް ބިނާވެފައިވާ އެހީތެރިއެއްގެ ގޮތުގައި ހިފެހެއްޓެން ޖެހޭ ކަމަށް ވަޒީރު ފާހަގަކުރެއްވިއެވެ.
ވަޒީރު ވަނީ، ކުދި ޖަޒީރާ ޤައުމެއްގެ ގޮތުގައި ތަރައްޤީވަމުން އަންނައިރު ރާއްޖެއަށް އޮތް ޚާއްސަ ހާލަތްތަކުގެ މައްޗަށް އަލިއަޅުވައިލައްވާފައެވެ. އެގޮތުން، ދިވެހި މުޖުތަމަޢުން ޒަމާނުންސުރެ ފެންނަ ޤުދުރަތީ ވަސީލަތްތަކާއި، ކަނޑުގެ ވަސީލަތްތަކާއި، ވާރުތަވަމުން އައި ބޭސްވެރިކަމުގެ އާދަތަކާއި ދިވެހި ބޭސްވެރިކަން ގުޅިފައިވާކަން ވަޒީރުގެ ވާހަކަފުޅުގައި ފާހަގަކުރެއްވިއެވެ. މި ކޮމިޓީ އެކުލަވާލުމުގެ މަސައްކަތަކީ ދިވެހި ބޭސްވެރިކަމުގެ ދާއިރާ އިތުރަށް ތަރައްޤީކޮށް، އެ ދާއިރާގެ ފެންވަރު ރަނގަޅުކުރުމަށް އަޅާ މުހިންމު ފިޔަވަޅެއް ކަމަށް ބެލެވެއެވެ.