އެމެރިކާ އަށް ދަތުރުކުރުން މަނާކުރާ ގައުމުތަކުގެ ލިސްޓަށް ފަސް ގައުމެއް އިތުރުކޮށް އޭގެ ތެރޭގައި ފަލަސްތީނުގެ ޕާސްޕޯޓް އޮންނަ މީހުން ހިމަނައިފިއެވެ.
ވައިޓް ހައުސް އިން ބުނީ މި ފިޔަވަޅު އެޅީ އެމެރިކާގެ ސަލާމަތާއި ރައްކާތެރިކަމަށް ކަމަށެވެ. އަދި އާ އުސޫލުގެ ދަށުން އެ ފަސް ގައުމުގެ މީހުން އެމެރިކާ އަށް ދަތުރުން މަނާކުރުމުގެ އަމުރަށް އަމަލު ކުރަން ފަށާނީ ޖެނުއަރީ މަހުގެ 1 ވަނަ ދުވަހުން ފެށިގެން ކަމަށް ވެސް ބުނެފައިވެއެވެ.
އެމެރިކާ އިން އެތެރެވުން މަނާކުރި ލިސްޓަށް އިތުރުކުރި ފަސް ގައުމުގެ ތެރޭގައި ބުރްކިނާ ފާސޯ، މާލީ، ނައިޖަރު، ސައުތު ސޫދާ އަދި ސީރިއާ އާއި ފަލަސްތީނުގެ ޕާސްޕޯޓް އޮންނަ މީހުން ހިމެނެއެވެ.
ޖޫން މަހު ރައީސް ޓްރަމްޕް ވަނީ 12 ގައުމެއްގެ ރައްޔިތުން އެމެރިކާއަށް ދަތުރުކުރުން މަނާކުރާނެ ކަމަށާއި އިތުރު ހަތް ގައުމެއްގެ ރައްޔިތުންނަށް އެގައުމަށް ދަތުރު ކުރުމާ ގުޅޭ ހުރަސްތަކެއް އަޅާނެ ކަމަށް އިއުލާން ކޮށްފައެވެ.
ޓްރަމްޕް ސަރުކާރުން ކުރިން ނެރުނު، އެމެރިކާ އަށް ދަތުރުކުރުން މަނާ ގައުމުތަކުގެ ތެރޭގައި އަފްޣާނިސްތާން، މިޔަންމާ، ޗާޑް، ރިޕަބްލިކް އޮފް ކޮންގޯ، އިކުއެޓޯރިއަލް ގިނީ، އެރިޓްރިއާ، ހޭއިޓީ، އީރާން، ލީބިޔާ، ސޯމާލިއާ، ސޫދާން އަދި ޔަމަން ހިމެނެއެވެ. އަދި ބުރޫންޑީ، ކިއުބާ، ލާއޯސް، ސިއެރާ ލިއޯން، ޓޯގޯ، ތުރުކްމެނިސްތާން އަދި ވެނެޒުއެލާއިން އެމެރިކާއަށް ޒިޔާރަތްކުރާ މީހުންނަށް ވަނީ އިތުރު ހުރަސްތައް ކުރިމަތިކޮށްފައެވެ.
އެމެރިކާއަށް ދަތުރު ކުރުމަށް އިތުރު ހުރަސްތަކެއް ކުރިމަތިވާނެ ގައުމުތަކުގެ ލިސްޓުގައި ވެސް 15 ގައުމެއް ވަނީ ހިމަނައިފައެވެ. އެއީ އެންގޯލާ، އެންޓިގޫއާ އެންޑް ބާބިއުޑާ، ބެނިން، ކޯޓެ ޑިވޯ، ޑޮމިނިކާ، ގޭބޯން، ގެމްބިއާ، މަލާވީ، މޮރިޓޭނިއާ، ނައިޖީރިއާ، ސެނެގާލް، ޓެންޒޭނިއާ، ޓޮންގާ، ޒެމްބިއާ އަދި ޒިމްބާބުވޭއެވެ.
ދަތުރުފަތުރު މަނާކުރުން ފުޅާކުރިކަން އިއުލާންކުރަމުން ޓްރަމްޕްގެ ސަރުކާރުން ބުނީ ދަތުރުކުރަން ހުރަސްއަޅާ ގިނަ ގައުމުތަކުގައި ކޮރަޕްޝަނާއި އޮޅުވާލުން ނުވަތަ އިތުބާރު ނުކުރެވޭ މަދަނީ ލިޔެކިޔުންތަކާއި ޖިނާއީ ރެކޯޑްތައް ހުރުމުން އެމެރިކާއަށް ދަތުރުކުރާ އެ ގައުމުތަކުގެ ރައްޔިތުން ވެޓްކުރަން ދަތި ކަމަށެވެ. އަދި ވިސާދޭ މުއްދަތަށް ވުރެ ގިނަ ދުވަހު އެ ގައުމުގައި ތިބޭ މީހުންގެ އަދަދު އިތުރުވެފައިވާ ކަމަށް ވެސް ބުނެފައިވެއެވެ.