އޮސްޓްރޭލިއާގެ ބޮންޑައި ބީޗްގައި ޔަހޫދީންގެ ފެސްޓިވަލެއް ކުރިއަށްދަނިކޮށް ދިން ހަމަލާގައި ބަޑި ހިފައިގެން ހުރި ހަމަލާދޭ މީހެއްގެ ކައިރިން ބަޑި އަތުލި އަހްމަދު އަލް އަހްމަދަށް އާންމުން މިހާތަނަށް 1.1 މިލިއަން ޑޮލަރަށް ވުރެ ގިނަ ޑޮލަރު ހަދިޔާގެ ގޮތުގައި ލިބިފައިވާ ކަމަށް ބުނެފިއެވެ.
އޮސްޓްރޭލިއާގައި މޭވާ ވިއްކުމުގެ ވިޔަފާރިކުރާ ދެ ކުދިންގެ ބައްޕައެއް ކަމަށްވާ އަހްމަދު ވަނީ ހަތިޔާރެއް ނެތި ބަޑި ހިފައިގެން ހުރި މީހެއްގެ ފަހަތުން ދިއުމަށް ފަހު ކަރުގައި ބައްދައި ވައްޓާލައި ބަޑި އަތުލައިފައެވެ. އޭނާ އެ ބަޑި އެ މީހާއާ ދިމާލަށް އަމާޒުކޮށް ދުރަށް ޖައްސަވާފައިވާއިރު، ބަޑި ގެއްލުނު މީހާ ވަނީ ދެ ވަނަ ހަމަލާދޭ މީހާ ކައިރިއަށް ގޮސް އަލުން ހަމަލާގައި ބައިވެރިވެފައެވެ. ހަމަލާދިން ދެ މީހުންގެ ތެރެއިން އުމުރުން 50 އަހަރުގެ މީހާ ހަމަލާތެރޭގައި މަރުވެފައިވާއިރު، 24 އަހަރުގެ އޭނާގެ ފިރިހެން ދަރިފުޅު ހައްޔަރުކޮށްފައިވާ ކަމަށް ވެއެވެ. މި ހަމަލާގައި 15 މީހުން މަރުވިއެވެ.
އަހްމަދުގެ އަތާއި ފައިގައި ވަޒަން އަރައި ޒަހަމްވެފައިވާއިރު، އޭނާގެ ހިތްވަރުގަދަ އަމަލަށް އޮސްޓްރޭލިއާގެ ބޮޑުވަޒީރު އެންތަނީ އަލްބަނީޒް ވަނީ ތައުރީފް ކުރައްވައިފަ އެވެ. އަލްބަނީޒް ވިދާޅުވީ ހަމަލާގައި ފެނިގެން ދިޔައީ ޓެރަރިސްޓް ހަމަލާއެއްގައި އިންސާނިއްޔަތާ ހިލާފްކަމުގެ އެންމެ މަތީ ދަރަޖަ ކަމަށާއި އެކަމަކު އަހްމަދު އަމިއްލަ ފުރާނައަށް ބެލުމެއް ނެތި ނުރައްކަލާ ކުރިމަތިލައި ދައްކައިދިނީ އިންސާނިއްޔަތުކަމުގެ އެންމެ މަތީ ދަރަޖަ ކަމަށެވެ.
90ގެ ކުރީކޮޅު ސީރިއާއިން އޮސްޓްރޭލިއާއަށް ހިޖުރަކުރި އަހުމަދަކީ ކުރިން ފުލުހުންގެ ވަޒީފާ އަދާކޮށްފައިވާ މީހެކެވެ. އޭނާއަކީ ބަތަލެއްކަމަށް ބުނެ ތައުރީފުކޮށް އޮސްޓްރޭލިއާ އާއި އެހެން ގައުމުތަކުގެ މީހުން ފައިސާގެ އެހީތެރިކަން ފޯރުކޮށްދޭން ފެށުމާ އެކު އެ އަދަދު މިލިއަނަކަށް ވުރެ މައްޗަށް ގޮސްފައިވާ ކަމަށް އޭނާގެ ބައްޕަ ވަނީ ބުނެފަ އެވެ.