މިފްކޯއަށް ގަންނަ ކަޅުބިލަމަހުގެ ތެރެއިން ރަނގަޅު އަގު ލިބޭ، ސައިޒުގެ މަހަކީ 1.5 ކިލޯއަށް އޮތްއޮތުން ބަދަލުކޮށް ކިލޯއަކަށް ވުރެ ބަރުނަމަ އެންމެ މަތީ ރޭޓުގައި މަސް ގަންނަން ނިންމާފައިވާކަން ރައީސް ޑރ. މުހައްމަދު މުއިއްޒު އިއުލާންކުރައްވައިފިއެވެ.
ރައީސް އެކަން އިއުލާން ކުރެއްވީ ރ. ދުވާފަރުގައި މިރޭ ބޭއްވި މަސްވެރިންގެ ދުވަހުގެ ރަސްމީ ޖަލްސާގައެވެ.
”މިހާތަނަށް މިފްކޯ އާއި ފިޝަރީޒް މިނިސްޓްރީއާ އެކީގައި ކުރެވުނު މަސައްކަތުގެ ނަތީޖާއެއްގެ ގޮތުން އަޅުގަނޑުމެން މިއަދުން ފެށިގެން ގެންނަ މައިގަނޑު އެެއް ބަދަލަކީ ދޮޅު ކިލޯގެ ބަދަލުގައި އެއް ކިލޯއިން ފެށިގެން މަތީގެ މަހަށް އެންމެ މަތީ ރޭޓުގައި މަސް ގަންނަ ގޮތަށް ބަދަލުކުރުން،“ ރައީސް ވިދާޅުވިއެވެ.
މިފްކޯއިން މިހާރު ކަޅުބިލަމަހާއި ކުދި ކަންނެއްޔަށް ދޭ އެންމެ ބޮޑު އަގަކީ ކިލޯއަކަށް 16 ރުފިޔާ އެވެ. އަދި ކުދިމަސް ކަމަށް ބަލަނީ 1.5 ކިލޯއަށް ވުރެ ލުއި މަހެވެ.
”އެންމެ މަތީ ރޭޓޭ މި ދެންނެވީ 16ރ. އަށް މިހާރު މި ގަންނަ ގަތުން، އަދި އެވެސް ވަރަށް މުހިންމު ބަދަލެއް މި ގެންނަނީ، އެންމެ ދަށްވެގެން 16ރ. އަށް ގަންނަ ގޮތަށް މިފްކޯ އިން މާދަމާއިން ފެށިގެން ފަށާނެ،“ ރައީސް ވިދާޅުވިއެވެ.
”މާނައަކީ މިފްކޯއަށް އެ ދުވަހަކު 17ރ. އަށް ގަނެވެންޏާ، 18ރ. އަށް ގަނެވެންޏާ އެ ބޭފުޅުން އަދި އެއަށް ވުރެ މައްޗަށް ވެސް ގަނެވެންޏާ މިފްކޯ އިން ކަނޑައަޅާނެ އެ ވަގުތަކު ގަނެވޭނެ އެންމެ މަތީ އަގު. އެންމެ ދަށްކޮށް 16ރ.“
މިއީ މަސްވެރިންގެ ޒަމާންވީ ކަންބޮޑުވުމެކެވެ. މިއަދު ދުވާފަރުގައި އެމަނިކުފާނު މަސްވެރިންނާ ބައްދަލުކުރެއްވުމުން ވެސް މި ކަންބޮޑުވުން މަސްވެރިން ހިއްސާކުރިއެވެ.