އައްޑޫ ސިޓީ ހިތަދޫ މިސްކިތަކަށް ގެއްލުން ދިން މައްސަލަ ބަލަން ފަށައިފިއެވެ.
ފުލުހުން ބުނީ ހިތަދޫގެ މިސްކިތެއްގައި ހުރި ބައެއް ތަކެއްޗަށާއި، މިސްކިތަށް ގެއްލުން ދީފައިވާ މައްސަލަ ނޮވެންބަރު 10 ވަނަ ދުވަހުގެ 17:40 ހާއިރު ފުލުހުންނަށް ރިޕޯޓުކޮށްފައިވާ ކަމަށެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ އައްޑޫ ސިޓީގެ މިސްކިތަކަށް ގެއްލުން ދިން މައްސަލަ މިނިސްޓްރީގެ ސަމާލުކަމަށްވަނީ އައިސްފައިވާ ކަމަށެވެ. މި މައްސަލަ ބަލައި ތަހުގީގުކޮށް، ގާނޫނީ ގޮތުން ފިޔަވަޅު އެޅުމަށް ކަމާބެހޭ އިދާރާތަކާ ގުޅިގެން އެ މިނިސްޓްރީން މަސައްކަތް ފަށާފައިވާ ކަމަށެވެ.
މަޢުލޫމާތު ލިބިފައިވާ ގޮތުގައި ގެއްލުން ދީފައިވަނީ އައްޑޫ ސިޓީ ހިތަދޫ މަސްޖިދުލް ޢުމަރުލް ފާރޫޤަށެވެ. މިހާރު މީސްމީޑިއާގައި ދައުރުވަމުންދާ ވީޑިއޯއަކުން ފެންނަ ގޮތުގައި މިސްކިތުގައި ހުރި ގޮނޑިތައް އުކާލައި ފަންކާވެސް ވަނީ ހަލާކުކޮށްލައިފައެވެ. އަދި މިސްކިތުގެ ކަރަންޓު ބޯޑަށް ގެއްލުން ދީފައިވާ މަންޒަރުވެސް ވީޑިއޯއިން ފެނެއެވެ.