މާލެ ސަރަޙައްދުގައި ކާބޯތަކެތީގެ ޚިދުމަތް ދޭ ތަންތަން މޯލްޑިވްސް ފުޑް އެންޑް ޑްރަގް އޮތޯރިޓީ، އެމްއެފްޑީއޭއިން ބަލައި ފާސްކުރުމަށް ނިންމައިފިއެވެ.
އެމްއެފްޑީއޭއިން ކުރި އިޢުލާނެއްގައި ވިދާޅުވީ، މިކަން ކުރިއަށްދާނީ އެ އޮތޯރިޓީ އާއި މާލެ ސިޓީ ކައުންސިލް އަދި ހައުސިންގ ޑިވެލޮޕްމަންޓް ކޯޕަރޭޝަނުން ގުޅިގެން ކަމަށެވެ.
އެމްއެފްޑީއޭއިން ވިދާޅުވީ، ކާބޯތަކެތީގެ ޚިދުމަތް ދޭ ތަންތަނުގެ ސާފުތާހިރުކަމުގެ މިންގަނޑުތައް ދެމެހެއްޓުމަށް ބާރުއެޅުމަށާއި، އެ އޮތޯރިޓީގައި ރަޖިސްޓްރީނުކޮށް ކާބޯތަކެތީގެ ޚިދުމަތް ދޭ ފަރާތްތަކުގެ މަޢުލޫމާތު އެއްކުރުމަށް މިހިނގާ ސެޕްޓެމްބަރު މަހުގެ 21 ވަނަ ދުވަހުން ފެށިގެން މިމަހުގެ ނިޔަލަށް މާލެ ސަރަޙައްދުގައި ޚާއްޞަ އިންސްޕެކްޝަނެއް ކުރިއަށް ގެންދިޔުމަށް ހަމަޖެހިފައިވާ ކަމަށެވެ.
މީގެ އިތުރުން އެ އޮތޯރިޓީން ވިދާޅުވީ، ކާބޯތަކެތީގެ ޚިދުމަތް ދޭ ތަންތަނަކީ ‘ކާބޯތަކެތީގެ ރައްކާތެރިކަމުގެ ޤާނޫނު’ ގެ ދަށުން އެމްއެފްޑީއޭގައި ރަޖިސްޓްރީކުރުމަށް ލާޒިމުކޮށްފައިވާ ތަންތަނަށް ވީއިރު، ރަޖިސްޓްރީނުކޮށް ހިންގާ ތަންތަން ބަންދުކުރުމާއި އެފަދަ ތަންތަނުގެ މަޢުލޫމާތު މި އިންސްޕެކްޝަންގެ ތެރެއިން ޢާންމުކުރަން ނިންމަވާފައިވާ ކަމަށެވެ.
އެމްއެފްޑީއޭއިން ވަނީ، މީގެ ކުރިން ވެސް ރާއްޖޭގެ އެކި ކަންކޮޅުތަކުގައި ރައްޔިތުންގެ ރައްކާތެރިކަން ކަށަވަރުކުރުމަށް މިފަދަ މުހިންމު ޕްރޮގްރާމްތައް ހިންގާފައެވެ.